A plataforma, que engloba a colectivos de todo o país, presentou un recurso para esixir que o Estado poña fin á realización de actividades lúdicas na illa redondelá
Piden que, tras o período de alegacións, se recoñeza o papel das asociacións no recoñecemento dos lugares de memoria e tamén nas actividades futuras
​A Iniciativa Galega pola Memoria demanda que as recentes declaracións das illas de San Simón e Santo Antón así como do Pazo de Meirás como lugares de memoria leven aparelladas que o seu uso se destine á recuperación da memoria das vítimas do franquismo.  O memorialismo galego considera que o recoñecemento do Pazo e  das illas como lugar de memoria é un paso positivo, mais botan en falta unha maior concreción e compromiso por parte do goberno central para protexer estes espazos referenciais da represión e da resistencia antifranquista. 
No caso concreto da illa de San Simón e san Antón,  a IGM vén de presentar un recurso no que reclaman que se revise e amplíe o contido da declaración como lugar de memoria, dotando dunha maior protección os espazos relacionados con traballos forzados, lugares de castigo, tortura e morte. Lembran que máis de 500 presos morreron na illa polas duras condicións do presidios e varios centos foron sacadas do recinto para seren asasinadas.
A IGM cuestiona a afirmación oficial de que “a declaración como lugar de memoria democrática non altera o uso actual”, xa que esta redacción lexitima de facto as actividades que se veñen desenvolvendo en San Simón baixo a xestión da Xunta, e que consisten basicamente en eventos de lecer, festivais musicais e de danza, campamentos de temática pirata ou excursións turísticas de carácter comercial.
Para a IGM a pervivencia destes usos mercantís e lúdicos é contraria ao seu simbolismo como lugar de memoria e de respecto e constitúe unha evidente banalización do espazo. Por iso considera que deben ser restrinxidos mediante unha norma que regule o tipo de actividades que son compatíbeis coa condición de lugar de memoria democrática e, nese senso, solicitan que se cumpra o compromiso de vixiar á Xunta no desenvolvemento de actividades, tal e como apuntou Fernando Martínez, secretario de Estado de Memoria Democrática, na súa intervención na illa.
A IGM pide tamén que o Estado recoñeza formalmente o papel que as entidades memorialistas tiveron na solicitude de declaración de San Simón como lugar de memoria, xa que foron estas quen o promoveron en xullo de 2024. Porén, ese  extremo  non foi  recollido pola administración cando, un ano máis tarde, incoou de oficio o procedemento sen sequera dar resposta ao escrito da asociacións. Por iso agardan que o Estado recoñeza o papel fundamental que estas tiveron na demanda do nomeamento das illas como lugar de memoria, e que sexan tidas en conta á hora de celebrar futuros actos para evitar agravios como os vividos ata o de agora. 

Conmemoramos o 90 aniversario do golpe militar que desatou unha brutal represión e provocou milleiros de vítimas en diferente grao, desde a morte e a tortura até o exilio ou o cárcere pero que, en calquera caso, todas sofreron inxustamente as consecuencias do asalto pola forza ao poder do Estado de quen non lograba pacificamente acadar o apoio suficiente da vontade popular democraticamente manifestada. 
Lembramos colectivamente un pavoroso acontecemento da nosa Historia e facémolo co fin de preservar a súa memoria e manter vivo o seu terrible significado. Porque non podemos, nin queremos, esquecérmonos do padecemento das vítimas da sublevación militar fascista de 1936.
Esa ideoloxía que animou daquela o uso da violencia para compensar a súa falla de argumentos é hoxe un ideario en auxe, que lonxe de ser un vestixio do pasado aínda fascina a grandes capas da poboación que se ven seducidas pola inculpación a chibos expiatorio dos seus males. Por isto é tan importante a memoria como vacina contra estes totalitarios ao lembrar os seus efectos perniciosos: a destrución física, económica e cultural que provocaron na nosa sociedade e da cal aínda non nos recuperamos.
É pois, hoxe, 20 anos despois da fundación deste espazo de encontro, que consideramos máis necesario que nunca o labor que estamos a facer as entidades e persoas que confluímos na Iniciativa Galega pola Memoria. 20 anos despois da celebración daquel ano da memoria e a denominación de San Simón como Illa da Memoria, recordamos aqueles pasos adiante que demos entón, para ser conscientes dos pasos atrás que se están a dar agora e que requiren que reaccionemos con máis contundencia. 
Por iso reafirmámonos nos principios comúns que nos uniron xa hai dúas décadas. 
O dereito a verdade 
Continúamos a denunciar as trabas para acceder aos arquivos e a falla de difusión do acontecido durante o período franquista. Seguimos a demandar apoio á conservación e potenciación dos arquivos da memoria, tanto públicos como de partidos, sindicatos, fundacións e outras entidades.
Instamos á Administración a que apoie os familiares das vítimas da represión na procura de información, presentación de reclamacións, e cantos trámites precisen.
Esiximos a intervención pública das distintas administracións nos labores de localización, identificación das foxas de enterramentos das vítimas do franquismo e, no seu caso, exhumación. A divulgación dos resultados e a elaboración dun protocolo de actuación científica multidisciplinar.
Tamén a revisión dos currículos escolares, fomentando e apoiando a elaboración de materiais didácticos sobre o período republicano, a sublevación militar fascista, a Ditadura e a resistencia antifranquista.
O dereito á xustiza
Esiximos a condena do franquismo, que foi declarado en decembro de 1946 pola ONU como un réxime criminal. 
A declaración da nulidade dos xuízos franquistas, de todos os procesamentos, sentenzas, expedientes, condenas e sancións, tanto durante a Guerra Civil como na posterior Ditadura, ate a aprobación da Constitución española no ano 1978. 
A aplicación do dereito internacional sobre as vítimas da represión franquista, incompatible con calquera mecanismo de impunidade, é dicir a súa imprescritibilidade. 
A consideración dos crimes do franquismo como delitos contra a humanidade. E A anulación, seguindo a recomendación da Comisión de Dereitos Humanos da ONU datada o 30/10/2008, da Lei de Amnistía do ano 1977.
O dereito á reparación
Pedimos a todas as administracións (central, autonómica e local) a retirada nos espazos públicos dos símbolos franquistas e as referencias ás persoas relacionadas coa Ditadura que sirvan para a exaltación deste réxime.            .
E reclamamos actuacións proactivas a prol de significar os lugares de memoria coa súa respectiva sinalización e conservación, así como o respaldo a todas as iniciativas que contribúan ao recoñecemento público das vítimas a través de monumentos, rótulos ou denominacións de locais, etc.. co fin de reparar persoal e socialmente a aqueles que sufriron a represión franquista.
E desde este lugar que foi campo de concentración, esiximos a inmediata declaración  como lugar da memoria da Illa de San  Simón e do Pazo de Meirás empregando o seu uso para a difusión da nosa memoria histórica, así como o apoio e a tramitación favorábel das iniciativas locais de recoñecemento de lugares da memoria que se presenten.
Garantías de non repetición
Demandamos tamén a regulación da apoloxía do franquismo como delito, e a prohibición de toda exaltación do mesmo. Que se protexan e amparen os monumentos memorialísticos, e se investigue e persiga a súa vandalización coa conseguinte sanción exemplar aos culpábeis.
En definitiva, sobran os motivos para seguir a reivindicar memoria. Vimos xuntándonos todos os anos desde hai 20 nesta illa para a homenaxe nacional ás vítimas do franquismo na Galiza. Co vento a favor ou en contra seguimos a remar todos xuntos,  todas xuntas, ano tras ano, na dirección dun mundo mellor no que a democracia, a paz e a liberdade pola que loitaron as persoas que aquí lembramos sexan ao fin realidade.​

Un milleiro de persoas acompañaron o movemento memorialista galego na manifestación deste sábado en Meirás, que topou as portas do Pazo pechadas polo Goberno do Estado quen impediu unha xornada festiva nos xardíns das Torres, un espazo recuperado co esforzo de ducias de activistas durante máis de corenta anos, un espazo público e de memoria democrática prohibido hoxe ás vítimas da barbarie fascista, representadas nunhas imaxes en carteis colocadas ás portas de Meirás nos prolegómenos da marcha.
“Desde a última marcha a Meirás mudou algo moi significativo. O Pazo agora é patrimonio do Estado. O que non mudou é o lado do muro no que temos que manifestarnos. Seguimos sen poder entrar no Pazo de Meirás. O Estado español non permitiu. Nunha democracia normal, hoxe as portas de Meirás estarían abertas. Mais están pechadas”, dixo Carlos Babío, portavoz da #IniciativaDEFENDEMeirás, plataforma da manifestación que apoiaron 68 organizacións memorialistas de todo o país, partidos, sindicatos, asociacións veciñais e culturais.
O escenario, previsto para ser instalado nos xardíns do Pazo, situouse finalmente na explanada principal, a carón das portas que o Goberno central se negou a abrir sen xustificar a súa negativa en argumento ningún. Pouco despois das doce, arrancou a marcha cunha pancarta co lema O Pazo para o pobo e a memoria, seguida doutra levada por persoas represaliadas durante os estertores do franquismo na Transición e que recollía a lista das case seiscentas persoas asasinadas polo terror fascista a partir del 1936.
“Por aquelas e aqueles que viron as súas casas e terras furtadas para maior gloria do ditador e do seu réxime. Por aquelas e aqueles que, en tempos de miseria, tiveron que dar o que non tiñan para obsequiar a quen lles negaba a liberdade. Por aquelas e aqueles que padeceron persecución por seren veciñas e veciños do ditador. Por aquelas e aqueles que nos anos da II República soñaron cun Meirás e cunha Galiza na que vivir unha vida xusta e traballaron con entusiasmo pola conquista desa idea. E remataron nunha cuneta, no cárcere, nos montes, no exilio. Ou simplemente obrigadas e obrigados a recibir a Franco ao berro de Arriba España e co brazo en alto, ou colgando a bandeira bicolor no balcón da súa casa baixo coacción. Aclamando pola forza a quen lles furtara o futuro. Por todas e todos, reivindicamos un pazo de Meirás en posesión do pobo”, explicou Manuel Pérez Lorenzo, outro dos portavoces da plataforma impulsada pola IGM (Iniciativa Galega pola Memoria), durante a lectura do manifesto.
Na marcha, de apenas tres quilómetros por estradas dos arredores do Pazo, tomou parte o alcalde de Sada, Benito Portela, que colaborou na organización do acto, xunto a líder e portavoz nacional do BNG, Ana Pontón e outros cargos nacionalistas, militantes e simpatizantes de Anova, con Antón Sánchez á cabeza, de Podemos, con Antón Gómez-Reino, Esquerda Unida e de Sadamaioría e da Marea Atlántica. Partidos, sindicatos e asociacións arrouparon aos representantes do movemento memorialista da Coruña, con Fernando Souto, presidente da CRMH, e as ex presidentas Beatriz Gómez e Manuel Monge, con outros destacados activistas da loita por Meirás, como Plácido Lizancos. Tamén estiveron presentes colectivos memorialistas do resto de Galiza.
“Estamos aquí porque a batalla por Meirás non rematou”, dixo Carlos Babío na lectura do manifesto, despois das intervención dos actores Isabel Risco e Fernando Morán, que ofreceron unha parodia da familia Franco, e de tres pezas das Tanxugueiras que entusiasmaron aos asistentes. “De agora en adiante, Meirás debe servir para honrar a memoria das vítimas. Sen menoscabo doutras funcións e valores que o conxunto atesoura, o pazo de Meirás ten que ser no futuro fundamentalmente un espazo referente de memoria democrática, pois foi epicentro do poder do franquismo durante 36 veráns e é resultado dun espolio continuado. Por iso foi reivindicado como patrimonio público, non por ningunha outra razón”, concluíu Babío, quen subliñou que o obxectivo do acto non era outro que impedir a rapina dos Franco e volveu reclamar que o Estado e a Xunta de Galiza se impliquen en protexer os bens todos que forman parte dun conxunto declarado Ben de Interese Cultural.
O berro de ‘Franquismo Nunca Máis’ e co agradecemento da #IniciativaDefendeMeirás a todas as asociacións que colaboraron na mobilización, ao Concello de Sada pola súa decisiva contribución para poder celebrar un acto salvando todos os obstáculos que puxo a Administración central, a Luis Davila, autor do cartel, as artistas que se comprometeron na festa, Isabel Risco, as Tanxugueiras (Aida, Olaia e Sabela) e Fernando Morán e todas as persoas que colaboraron achegando o seu apoio, rematou a maior mobilización das memorias do país desde hai quince anos.   

A plataforma agradece o apoio de milleiros de persoas e ducias de colectivos que empurraron a loita capitaneada por Babío e Pérez Lorenzo que, de novo, lograron con pedagoxía e divulgación mudar a decisión do Estado, inasumíbel en democracia
Máis alá do que determine o Supremo, para a IGM a decisión de onte é unha vitoria e agarda que “o pobo non volva precisar nunca facer titánicos esforzos para lograr que Estado e Xunta defendan a memoria das vítimas do xenocidio franquista”
A Coruña, 10 de marzo de 2021. A Iniciativa Galega pola Memoria quere amosar a súa satisfacción pola decisión do Estado de recorrer a sentenza da Audiencia Provincial da Coruña que, ademais de obrigar a indemnizar á familia Franco, establece a boa fe no proceder do ditador e a súa descendencia. Para o colectivo, o cambio de parecer dos gobernos, tanto estatal como autonómico, volve amosar a forza da loita pola memoria que o pobo galego vén exercendo desde hai décadas. Sen o esforzo maratoniano realizado nos últimos quince días por millares de persoas e ducias de colectivos galegos e estatais, as administracións avalarían unha sentenza que resulta totalmente inasumíbel desde o punto de vista democrático, non só por pretender institucionalizar o espolio a través da entrega de cartos públicos a quen o realizou, senón tamén por dar por bo un relato edulcorado da ditadura xenocida que suporía unha nova burla ás vítimas.
A loita social foi clave para rematar coa incomprensíbel pasividade que as institucións democráticas mantiveron durante máis de corenta anos respecto ao espolio da familia Franco. O cambio que supuxo a interposición en xullo de 2019 da demanda para a recuperación de Meirás veu provocado por anos de mobilización social. Cando foi iniciada por apenas media ducia de integrantes da CRMH da Coruña que se apostaban cunha pancarta ás portas do Pazo pedindo a súa devolución, a súa pretensión era considerada unha tolemia, pero seguiron adiante e o seu constante e solitario esforzo persoal conseguiu a base de investigación e divulgación mudar a opinión pública: a das institucións e a da sociedade galega, que hoxe é maioritariamente –mesmo unanimemente se temos en conta a postura do seu Parlamento- partícipe da loita contra a impunidade franquista que simboliza Meirás. Para o cambio foi clave o titánico e desinteresado traballo dos investigadores Carlos Babío e Manuel Pérez Lorenzo, sobre o que se sustentou a demanda estatal. Dous anos despois da súa presentación, o seu papel e o do movemento memorialístico volve ser clave para lograr, con apenas quince días de marxe, facer cambiar de opinión aos dous gobernos que, de novo, se querían amparar en cuestións técnicas para eludir a súa obriga de defender, sen escusas, os postulados democráticos.  Nas últimas dúas semanas, Babío e Pérez Lorenzo encabezaron un manifesto que de novo facía pedagoxía respecto a postura da Audiencia e as súas consecuencias, e lograron co apoio sen fisuras de todos os colectivos englobados na IGM, miles de sinaturas e o apoio de ducias de agrupacións galegas e estatais, nomeadamente vascas, madrileñas e andaluces, en apenas 24 horas. Co mesmo obxectivo atenderon a medios de comunicación, reuníronse cos partidos representados no parlamento galego e encabezaron un acto reivindicativo nas portas da Delegación do Goberno. Onte o extenuante traballo daba os seus froitos cun comunicado do goberno totalmente diferente ao emitido quince días atrás.
Por todo iso, a IGM quere agradecer o esforzo de ambos, así como o de todas as persoas que a través da súa sinatura, do seu traballo nas diferentes organizacións memorialísticas ou co seu discurso nas redes ou no seno das súas respectivas agrupacións políticas, empurraron para lograr, de novo, mudar o que parecía inamóvibel. Alegrase de ter sido quen, unha vez máis, de demostrar que a base de traballo, información e determinación, o movemento memorialístico e en xeral, o pobo galego é quen de mudar unha posición do Estado que resultaba un atentado contra a dignidade das vítimas.
Máis alá do que determine o Tribunal Supremo, para a IGM a decisión de onte é unha vitoria e agarda que o pobo non volva precisar nunca máis facer titánicos esforzos para lograr que as administracións democráticas que o representan traballen na  defensa da memoria das vítimas do xenocidio franquista.